ഇടം - ആശയസമരത്തിന്റെ ഇന്ധനം

ഇടം ഇടതുപക്ഷ സൗഹൃദങ്ങളുടെ ഒന്നിക്കലാണ്. തകര്‍ക്കപ്പെട്ട സൗഹൃദങ്ങളുടെ വീണ്ടെടുക്കലാണ്. ‘ധീരനൂതന’ സൗഹൃദങ്ങളുടെ ദൃഡപ്പെടുത്തലാണ്. അന്യോന്യമുള്ള അടുപ്പങ്ങളുടെയും അകല്‍ച്ചകളുടെയും പുനര്‍നിര്‍ണ്ണയമാണ്. നിര്‍വ്വചനങ്ങളുടെ വീണ്ടുവിചാരങ്ങളും കണ്ടെത്തലുകളുമാണ്.

ഇടം ‘ഇടതുപക്ഷ’ത്തിനു വേണ്ടാതായ വര്‍ഗ്ഗസൗഹൃദത്തിന്‍റെ തിരിച്ചുവരവാണ്. പ്രച്ഛന്നവും പ്രത്യക്ഷവുമായ മൂലധനരാഷ്ട്രീയരൂപങ്ങളോടുള്ള ആശയസമരത്തിന്‍റെ ഇന്ധനമാണ്. അന്യവല്‍ക്കരിക്കപ്പെടുകയും അവമതിക്കപ്പെടുകയും ചെയ്ത ‘വര്‍ഗ്ഗബോധ’ത്തെയും ‘വര്‍ഗ്ഗസാഹോദര്യ’ത്തെയും ഇടം മുന്നണിയില്‍ തന്നെ നിര്‍ത്തുന്നു. ഒട്ടും പശ്ചാത്താപബോധമില്ലാതെ.

ഇടം ഇടതുപക്ഷ-വലതുപക്ഷ വേര്‍തിരിവുകളെ അപ്രസക്തമാക്കുന്ന സന്ധികളുടെയും സമരസപ്പെടലുകളുടെയും നിര്‍ദ്ദയമായ നിരാസമാണ്. വേള്‍ഡ് സോഷ്യല്‍ ഫോറം / ജാതി-മത-വംശ-സ്വത്വ രാഷ്ട്രീയം / എന്‍. ജി. ഒ. രാഷ്ട്രീയം ഇവകൊണ്ട് വര്‍ഗ്ഗരാഷ്ട്രീയത്തെ പകരം വെക്കുന്ന നവലിബറല്‍‌ പ്രത്യയശാസ്ത്ര പ്രമാണങ്ങളെ വിചാരണക്ക് വിധേയമാക്കുന്നു. കോര്‍പ്പറേറ്റ് ഫണ്ടുകളുടെയും കോര്‍പ്പറേറ്റ് രാഷ്ട്രീയത്തിന്‍റെയും സ്രോതസ്സുകളില്‍ നിന്ന് ‘പ്രത്യയശാസ്ത്രങ്ങളൊന്നുമില്ലാതെ’ ആം ആദ്മി രാഷ്ട്രീയം പിറക്കുന്നതെങ്ങനെയെന്നു ഇടം കൃത്യമായി തിരിച്ചറിയുന്നു.

ഇടം ഏതുരീതിയിലുള്ള ഫാസിസ്റ്റ് അധികാരപ്രയോഗങ്ങളുടെയും അതിലംഘനമാണ്. ഇടതുപക്ഷ-വലതുപക്ഷ വിലക്കുകളുടെ എതിരിടലാണ്. ഇടതുപക്ഷ സര്‍ഗ്ഗാത്മകതയുടെയും ധൈഷണികതയുടെയും ആഴങ്ങളുടെ അവസാനിക്കാത്ത അന്വേഷണമാണ്.

ഇടം അയഥാര്‍ത്ഥമായ ഭാവിവാഗ്ധാനങ്ങള്‍ വെറുതെ ഉരുവിടുകയില്ല. ഇന്നലെയുടെ ഗൃഹാതുരത്വത്തിലേക്ക് പിന്തിരിയുകയുമില്ല. സാമ്രാജ്യത്വ ആഗോളീകരണം നമുക്ക് നഷ്ടപ്പെടുത്തുന്ന ഇടങ്ങള്‍ ഏതൊക്കെയാണെന്നും, വീണ്ടെടുപ്പ് എങ്ങനെയൊക്കെ ആകാമെന്നുമുള്ള ചിന്തകള്‍ ഇടതടവില്ലാതെ പങ്കിടുകതന്നെ ചെയ്യും.